**Na Ashton Balaigwa, Malinyi**
Serikali imetangaza kuanza kwa utekelezaji wa miradi ya ujenzi wa barabara na madaraja katika wilaya za Malinyi na Ulanga, mkoani Morogoro. Lengo ni kuboresha huduma za usafiri, kufungua maeneo hayo kiuchumi, na kuchochea ukuaji wa uchumi wa wananchi.
Waziri wa Ujenzi, Abdallah Ulega, alitangaza hayo alipokuwa akizungumza na wananchi wa Malinyi na Ulanga wakati wa ziara yake ya ukaguzi wa miradi ya maendeleo ya miundombinu ya barabara na ujenzi wa madaraja katika wilaya hizo.
## Fedha Zimetengwa Bajeti ya 2026/2027
Waziri Ulega alieleza kuwa Serikali tayari imetenga fedha katika Bajeti ya Mwaka wa Fedha 2026/2027 kwa ajili ya utekelezaji wa miradi hiyo, ambayo inalenga kurahisisha uzalishaji na usafirishaji wa mazao ya kilimo pamoja na madini.
## Barabara ya Ifakara–Lupiro–Malinyi na Madaraja Mawili
Miradi hiyo inahusisha:
- Ujenzi wa barabara ya **Ifakara–Lupiro–Malinyi** yenye urefu wa kilometa 112 kwa kiwango cha lami
- Ujenzi wa **Daraja la Fuluwa** lenye urefu wa mita 100
- Ujenzi wa **Daraja la Namahanga**
Ulega alisema utekelezaji wa miradi hii ni sehemu ya dhamira ya Serikali ya Awamu ya Sita ya kuunganisha halmashauri zote za Mkoa wa Morogoro na makao makuu ya mkoa kupitia miundombinu bora ya barabara, ili kuhakikisha wananchi wanapata huduma salama na za uhakika za usafiri.
## Agizo la Kufanya Kazi Usiku na Mchana
Katika ujenzi wa madaraja, Waziri Ulega alimtaka mkandarasi anayejenga Daraja la Mto Furua (lenye urefu wa mita 100) kufanya kazi usiku na mchana ili mradi ukamilike haraka na kuwezesha huduma za mawasiliano kwa wananchi wa Malinyi na wilaya jirani.
Aliitaka pia TECU kutoshelewesha nyaraka (karatasi) baada ya mkandarasi kumaliza kuandaa na kuzifikisha kwao, kwa kuwa mradi wa Daraja la Fuluwa unapaswa kwenda kwa haraka na kukamilika kwa wakati.
> "Ninamtaka Msimamizi wa mradi huu hakikisheni mkandarasi anaagiza vitu vyake mapema kutoka nje ya nchi, hususani China, kwani ujenzi huo haupaswi kucheleweshwa. Baada ya kukamilika ujenzi wa Daraja la Fuluwa na lingine la Nyamhaga, wilaya ya Malinyi itakuwa imefunguka pamoja na wilaya nyingine za jirani," alisema Ulega.
## Ahadi ya Barabara ya Malinyi–Kilosa kwa Mpepo–Longo
Katika hatua nyingine, Waziri Ulega aliahidi kuendelea kufungua na kuboresha miundombinu ya Wilaya ya Malinyi kupitia ujenzi wa barabara ya **Malinyi–Kilosa kwa Mpepo hadi Longo**, ambayo itaunganisha Mkoa wa Morogoro na Mkoa wa Ruvuma.
## Shukrani za Mkuu wa Mkoa
Mkuu wa Mkoa wa Morogoro, Adam Malima, alishukuru Serikali ya Awamu ya Sita kwa kufufua mradi wa ujenzi wa barabara hiyo uliokuwa umesimama kwa muda mrefu. Alieleza kuwa utekelezaji wake utachochea maendeleo ya kiuchumi na kuboresha huduma za usafiri kwa wananchi wa Morogoro na mikoa jirani.
## TANROADS: Daraja Litafungwa Taa
Kaimu Meneja wa TANROADS Mkoa wa Morogoro, Mhandisi Patrick Rambika, alieleza kuwa Daraja la Mto Fuluwa lina urefu wa mita 100 na litafungwa taa.
Alisema kukamilika kwa daraja hilo kubwa kutaondoa adha ya usafiri kati ya Malinyi mjini na kuunganisha usafiri kwenda wilaya za Ulanga, Kilombero, na kuelekea Morogoro.
---
*Picha: Mkuu wa Mkoa wa Morogoro, Adam Malima (kushoto), akimpa maelezo Waziri wa Ujenzi, Abdallah Ulega (katikati), kuhusu mkakati wa ujenzi wa miundombinu ya barabara eneo la Mikumi, Wilaya ya Kilosa. Kuli
a ni Mbunge wa Jimbo la Mikumi, Dennis Londo.*
