Tanga — Agosti 2026
Tuzo ya Taifa ya Mwalimu Nyerere ya Uandishi Bunifu imeendelea kuonyesha mafanikio makubwa tangu kuanzishwa kwake, huku jumla ya Watanzania 27 wakifanikiwa kushinda tuzo hizo katika nyanja mbalimbali za uandishi bunifu.
Kauli hiyo imetolewa na Waziri wa Elimu, Sayansi na Teknolojia, Prof. Adolf Mkenda, wakati akizungumza na waandishi wa habari jijini Tanga kuelekea zoezi la ukusanyaji wa miswada kwa ajili ya Tuzo ya Taifa ya Mwalimu Nyerere ya Uandishi Bunifu.
Prof. Mkenda amesema mafanikio hayo yanaonyesha namna tuzo hiyo inavyoweza kuibua na kutambua vipaji vya waandishi bunifu nchini, huku idadi ya washiriki ikiendelea kuongezeka kila mwaka kutoka ndani na nje ya Tanzania.
Serikali yawekeza Sh milioni 800 kuchapisha vitabu
Waziri Mkenda amebainisha kuwa Serikali imewekeza takribani Sh milioni 800 kwa ajili ya kuchapisha vitabu vilivyoshinda tuzo hizo na kuvisambaza katika shule za Tanzania Bara na Zanzibar.
Amesema hatua hiyo inalenga kuwafikia wasomaji wengi zaidi, pamoja na kuhamasisha utamaduni wa kusoma na kukuza uandishi bunifu nchini.
Kwa mujibu wa Prof. Mkenda, tuzo hizo zimeendelea kukua na kuvutia washiriki kutoka mataifa mbalimbali, jambo linaloonyesha kuongezeka kwa hadhi yake na umuhimu wa uandishi bunifu katika kukuza fasihi na lugha ya Kiswahili.
Amesema tuzo hiyo pia imekuwa jukwaa muhimu la kuwahamasisha vijana na waandishi kutumia vipaji vyao kutengeneza kazi zenye ubunifu na maudhui yanayoweza kuelimisha, kuhamasisha na kujenga jamii.
«“Tuzo hii sasa imeingizwa rasmi katika orodha ya tuzo za uandishi bunifu duniani, ukiitafuta mtandaoni utaona tarehe 13 Aprili ni siku ya kutoa Tuzo ya Mwalimu Nyerere ya Uandishi Bunifu,” amesema Prof. Mkenda.»
Dirisha la kuwasilisha miswada lafanyika rasmi
Naye Mwenyekiti wa Kamati ya Kitaifa ya Tuzo ya Taifa ya Mwalimu Nyerere ya Uandishi Bunifu, Prof. Penina Mlama, amesema dirisha la kuwasilisha miswada ya kazi za ubunifu limefunguliwa rasmi Agosti 19, 2026, na litafungwa Novemba 30, 2026.
Prof. Mlama amesema waandishi bunifu wanatakiwa kutumia kipindi hicho cha takribani miezi mitatu kuandaa na kuwasilisha miswada yao.
Ameeleza kuwa matangazo yenye vigezo na taratibu za kushiriki yatapatikana kupitia mitandao ya kijamii ya tuzo hiyo, pamoja na mitandao ya Wizara ya Elimu, Sayansi na Teknolojia na Taasisi ya Elimu Tanzania.
Vigezo vya kushiriki
Kwa mujibu wa Prof. Mlama, mshiriki wa tuzo hizo anatakiwa kuwa raia wa Tanzania, huku kazi inayowasilishwa ikiwa imeandikwa kwa lugha ya Kiswahili.
Kila mwandishi anaruhusiwa kuwasilisha andiko moja tu katika nyanja atakayochagua. Aidha, mswada unaowasilishwa unatakiwa kuwa haujawahi kuchapishwa popote.
Kwa upande wa riwaya, urefu wa kazi unatakiwa kuwa kati ya maneno 60,000 hadi 100,000.
Kwa hadithi za watoto, kazi inatakiwa kuwa na kati ya maneno 250 hadi 500 kwa hadithi moja.
Prof. Mlama amesisitiza kuwa kazi zitakazowasilishwa zinapaswa kuwa na mawazo asilia ya mwandishi na kujikita katika masuala muhimu yanayoihusu jamii.
Tuzo ya Taifa ya Mwalimu Nyerere ya Uandishi Bunifu inaendelea kuwa moja ya majukwaa muhimu ya kutambua, kukuza na kuhamasisha vipaji vya uandishi, huku ikitoa nafasi kwa waandishi kutumia ubunifu wao katika kukuza fasihi na lugha ya Kiswahili.