NA SULEIMAN SHAGATA, MWANZA
SHEIKH Mkuu Mkoani Mwanza, Hassan Kabeke, amepongeza uamuzi wa Rais Samia Suluhu Hassan wa kuchukua jukumu la kulea mtoto mchanga aliyetelekezwa baada ya kuzaliwa Mkoani Tabora hivi karibuni, tukio ambalo lilikuwa limezua wasiwasi mkubwa kwa usalama wa kichanga huyo.
Wito huo alitoa leo Jijini Mwanza wakati wa hafla ya kusoma Dua Maalumu ya kuombea wananchi na Serikali, iliyofanyika katika Msikiti wa Baraza Kuu la Waislamu Tanzania (BAKWATA) Mkoani hapa.
Sheikh Kabeke alisema ni jukumu la wananchi wote kuonesha ubinadamu kwa kusaidia kulea watoto wanaotelekezwa na kuachwa bila uangalizi katika kipindi ambacho bado wako katika uhitaji wa wazazi au walezi wao.
Akemea Vitendo vya Kutelekeza Watoto
Akizungumza kwa nguvu, Sheikh Kabeke alikemea vikali tukio hilo la kutelekeza mtoto, akisema si la kibinadamu kwani linakiuka misingi ya haki za binadamu ya kuishi.
"Nampongeza Rais wetu kwa kuwaonesha watanzania namna ya kuenenda kukabili matukio hayo mabaya ya kuzaa na kutelekeza watoto," alisema Sheikh Kabeke.
Aliongeza kuwa tukio la Mkuu wa nchi kuchukua jukumu la mstari wa mbele kumlinda kichanga huyo ni jambo la kiungwana, huku akionya kwamba tabia ya kutelekeza watoto hazipaswi kuruhusiwa kuendelea kwani ni chukizo mbele ya Mola.
Pia alikemea vikali uzazi nje ya ndoa, akisema uasherati ni kinyume cha mapenzi ya Mungu, na kuwataka Watanzania kutumia mwezi Mtukufu wa Ramadhan kukemea tabia hiyo.
Mshikamano wa Kiimani Wakati wa Ramadhan
Sambamba na hilo, Sheikh Kabeke aliwashukuru Waislamu wote Mkoani Mwanza kwa kuadhimisha Mfungo wa Ramadhan kwa umoja na upendo, huku akisisitiza umuhimu wa kuendeleza mshikamano huo.
Alisema mfungo huo umeonesha pia mshikamano kati ya Waislamu na Wakristo, baada ya kukaa pamoja na kufuturu, hali ambayo ni msingi imara wa kuimarisha umoja wa Watanzania.
"Somo la wema baina ya Wakristo na Waislamu limeonekana katika kipindi chote cha mfungo, hali hii ni faraja kwa Watanzania wote hapa nchini," alisema.
Mipango ya Ibada ya Mwandamo
Akielezea mipango inayokuja, Sheikh Kabeke alisema wanatarajia ibada ya kimkoa kwa mwandamo wa mwezi Mtukufu kufanyika katika Uwanja wa Nyamagana, Jiji la Mwanza.
Vilevile, BAKWATA Mkoani Mwanza wanatarajia kuwa na ibada maalumu ya usiku wa wanadoa katika Hoteli ya New Mwanza Hotel, ambayo mawaidha ya kudumisha na kuimarisha ndoa yatatolewa kwa wenzi wa ndoa.
Ripoti hii imetayarishwa na Suleiman Shagata kutoka Mwanza