Na Suleiman SHAGATA, Mwanza
Wakaazi wa Jiji la Mwanza wameendelea kujitokeza kwa wingi kwenye Tume ya Uchunguzi iliyoundwa kuchunguza machafuko yaliyotokea wakati na baada ya Uchaguzi Mkuu wa mwaka jana. Machafuko hayo yalisababisha vifo vya watu kadhaa, uharibifu mkubwa wa mali na majeruhi mengi.
Tume Yaanza Kazi Mwanza
Akizungumza Jijini Mwanza, Balozi Ombeni Sefue, mjumbe na kiongozi wa timu ya Tume hiyo, alisema kuwa wamefika kwa lengo la kuzungumza na wananchi walioathirika na tukio hilo. Aliwaomba wananchi kuwa wazi na kuzungumza bila uoga wowote kwani wako huru.
"Tumegawanyika katika makundi matatu kutembelea maeneo yaliyokumbwa na adha hiyo. Sisi tuko Mwanza na baada ya hapo tutatembelea mikoa ya Geita na Mara," alisema Sefue.
Njia za Kuwasilisha Ushahidi
Sefue aliainisha njia mbalimbali ambazo wananchi wanaweza kutumia kuwasilisha taarifa zao:
Ana kwa ana
Barua pepe
Ujumbe kwa simu
Kutuma picha
Mawasiliano ya Tume ya Uchunguzi
Alieleza kuwa tangu jana, watu zaidi ya 100 wamejitokeza na wanaendelea kuja kutoa taarifa. Kila taarifa inayowasilishwa inachukuliwa kwa ajili ya kutumiwa katika mchakato wa kuleta maridhiano ya kitaifa na kujenga mshikamano nchini.
Ushahidi wa Wananchi Walioathirika
Hasara za Kiuchumi
Reuben Gaudence, anayeishi Mtaa wa Mecco, alisema duka lake lilichomwa moto na bidhaa za thamani ya zaidi ya milioni 68 ziliteketea kabisa. Aliomba serikali kuangalia namna ya kuwasaidia kukabiliana na changamoto hiyo iliyomwacha bila kitu.
Meneja wa Luhuye Oil Co Ltd katika eneo la Kisesa alieleza kuwa gari lao la mafuta lilichomwa pamoja na nyumba. Kampuni hiyo inakadiria hasara ya zaidi ya milioni 221.7 kutokana na tukio hilo.
Kupoteza Maisha
Deodata Kizanti wa Kisesa, Wilaya ya Magu, alisema alipoteza mwanaye Leonard James ambaye alikuwa amehitimu kidato cha sita mwaka 2025 kutokana na kupigwa risasi wakati wa machafuko hayo.
Mama huyu mwenye umri wa miaka 56, ambaye ameshuhudia chaguzi nyingi, alisema hakuwahi kuona machafuko ya namna hiyo. Aliomba kuwepo kwa mikakati madhubuti ya kuzuia hali hiyo isijirudie tena hapa nchini.
Maombi ya Marekebisho
Baadhi ya wananchi waliohudhuria waliomba kuwepo kwa:
Tume huru ya uchaguzi
Katiba Mpya
Utashi wa kusikiliza maoni ya wananchi
Lengo la Tume ni kukusanya ushahidi wote unaohitajika ili kuleta maridhiano ya kitaifa na kuhakikisha kuwa mambo kama hayo hayajirudii katika uchaguzi ujao.
Tume ya Uchunguzi inaendelea na kazi yake ya kusikiliza wananchi katika mikoa ya Mwanza, Geita na Mara.